【扮工收風】遲到竟然被同事「篤灰」
職場新手

【扮工收風】遲到竟然被同事「篤灰」

【扮工男女】職場世界,防人之心不可無。打工仔遲到,自己負責,估唔到隔離位同事竟然無事搵事來做,走去上司面前「篤灰」(出賣),激到嗰位遲到同事紮紮跳。

朋友公司official開工時間係9點,但某同事經常920-25分先到公司,雖然公司有拍卡制度,但因為HR人少,所以一般都唔會check,除非有人投訴。

勢估唔到係,前日返工,呢位遲到同事竟然俾上司捉咗入房,上司劈頭第一句就講:「有同事反映你成日遲到,究竟係咩原因,睇吓我幫唔幫到你。」

遲到同事聽到「有同事反映」呢一句就相當火滾,即係有人金手指啦。你返你嘅工,我返我嘅工,遲到係個人嘅事,其他同事出聲,又難怪佢咁嬲。

因為同事太嬲嘅關係,決定之後按章工作,準時返工準時放工,以後OT唔使預佢。同事好知道自己嬲嘅係二五仔,上司都係反映同事意見,但同事之間搞到個關係咁樣,最終邊個得益呢?