【DSE 2019】你試過考試最當黑係乜?坐前面果位竟咁樣做…
校園生活

【DSE 2019】你試過考試最當黑係乜?坐前面果位竟咁樣做…

DSE(文憑試)已經開考,各位考生都搏晒命盡力考到最好成績。但係俗語都有云人生不如意之事十常八九,最怕就係唔好彩變咗「地獄黑仔王」!而有啲經歷你都咪話唔慘。就好似有位應屆考生喺討論區開post,話本身考核心科目之一英文嘅卷三,即係聆聽同綜合能力,竟遇到史上最慘事件,坐前面位考生原來係「臭屁蟲」!而且對方放屁唔係一次半次,竟係「放足2個鐘」!

考生聞屁2個鐘:個腦空晒

呢位考生回首,一開頭其實覺得前面果位就算放屁都「好正常」,但當鐘聲一開始對方就一直放屁。聆聽卷「超經典」音樂《綠袖子》,同啲臭屁味一齊飄過黎,考生已即刻閉氣。對方始終無停過放屁,臭味更加困擾到佢「個腦空晒」,甚至有兩題因為咁而聽唔到答案!

嚟到綜合能力卷,事主嘅「惡夢」仍未完結!呢份考卷要整合資料,其實要好強嘅專注力去完成。之不過「臭屁蟲」真係絕非浪得虛名,喺75分鐘嘅答卷時間內不斷施展「氣功」。最終呢位唔好彩嘅考生,就喺考試2個鐘內,聞足屁味2個鐘,坦言「遊戲體驗極差」,更誇張到離開試場後「連衫都有屁味」。

網民:最新擾敵方式 考生可要求調位

有網民笑言呢個係「新擾敵方式」!又有人鬧果位放屁考生「有返啲公德心」,竟然「要人邊考邊閉氣」;亦有人質疑果位考生係咪「特登飲完啤酒」所以狂放屁;亦有人話事主遇到咁嘅情況可以要求調位。

那些年的考試當黑經歷

呢件事令到大家都分享那些年,試場當黑經歷。有位網民就話自己中六考試時,有位女同學喺聆聽考試時肚痛,不過因為唔想錯過內容而頂硬上,結果竟然忍唔到「瀨屎」!當年成班人都要「被逼」喺試場聞臭味,呢單似乎比事主經歷更嚴重!

有網民就話自己位置的隔離行有另外兩位考生,未派卷時訓覺,開卷後又訓覺;呢個唔係最大問題,最大問題係兩人雖然「訓覺」但同時會「印印腳」(抖腳)!動作大到會整到張枱,繼而發出聲浪。緊張時聽到實會心煩意亂。

有過來人就覺得事主遇到嘅唔算太大件事,因為佢當年考試嘅試場,竟然撞正隔離樓裝修,好嘈就在所難免。雖然係咁,過來人話「幾嘈都專心到」,又話只要極度集中,就一定唔會被外來因素影響到。

考試中2支筆都突然斷墨「好似睇住自己生命慢慢流逝」

有老鬼就話當年考試時,就算帶咗兩支筆,都竟然突然斷墨,直言果時「好似睇住自己生命慢慢流逝」,好彩到最後去廁所時問到清潔工人借到筆先過到關。有人就話自己當年考數學時,無帶到計數機,咁樣其實都幾絕望。

考試對於學生嚟講當然好重要,不過多年後睇返轉頭亦只係小菜一碟。好彩與唔好彩都好,千祈唔好諗埋一邊,辦法總比困難多。小編都祝各位考生考DSE 2019順順利利,考到理想學系!

來源:連登討論區1

連登討論區2