【DSE 2019】文憑試冷知識拆解:聆聽試音樂有段故 非本地生經Jupas入U靠今年?
校園生活

【DSE 2019】文憑試冷知識拆解:聆聽試音樂有段故 非本地生經Jupas入U靠今年?

中學文憑試本月初開考,一眾考生進入最後衝刺階段。考會考、高考出身嘅你,見到電視機播放文憑試嘅畫面,有無勾起當年考試嘅回憶呢?文憑試究竟係乜呢?

何謂DSE?

文憑試全寫係香港中學文憑考試,英文為Hong Kong Diploma of Secondary Education Examination,所以又稱為DSE。因應334高中教育改革,考評局於2012年開始舉辦文憑試,今年已經嚟到第8屆。喺新學制下,所有學生完成3年初中、3年高中課程,就可以參加文憑試,成績符合資格者可升讀大學。

文憑試有別於過往嘅會考同高考,文憑試考生須報考4個核心科(中國語文、英國語文、數學及通識教育),以及2至3個選修科。評分方面,文憑試分1至5級,當中1級最低,5級最高。而5級入面再細分5*及5**,5**為考獲5級嘅考生中成績最佳者。

點解英文聆聽一定要播綠袖子?
無論你係考會考、高考定文憑試,相信對英文聆聽試嘅前奏音樂記憶尤新。話說當年香港電台首次播放聆聽試,要搵一首背景音樂,用流行曲當然唔合適,古典音樂都唔係咁啱,最後揀咗「綠袖子」(Green Sleeves)呢首源自西班牙嘅樂章。綠袖子自1995年起沿用至今,四分一世紀以來陪伴過唔少公開試考生,稱得上係集體回憶。小編覺得音樂本身幾抒情,令人心情放鬆,當然考試嘅時候就另當別論,分分鐘聽到心跳加速添呀!
計數機點解要「H.K.E.A. APPROVED」先可以帶入試場?
今日係文憑試數學科開考嘅日子,小編一直好好奇,點解一定要用「H.K.E.A.A. APPROVED」或「H.K.E.A. APPROVED」嘅計數機呢?原來曾經有學生改裝計數機嘅主機板,企圖藉此出貓。考試局得悉事件後,隨即要求全港學校將應考學生嘅計數機送到辦事處檢查,並花咗近3個月時間逐一檢查,印上標籤以茲識別。自1991年起,應考公開試時使用嘅計數機上,必須印有H.K.E.A. APPROVED或H.K.E.A.A. APPROVED嘅標籤。
報考機制漏洞?非本地考生爭最後機會經JUPAS入大學

考文憑試無非都係為咗入大學,而香港嘅大專院校招收過多內地學生,一直為人所詬病。根據考評局最新公佈數字,報考文憑試嘅本地學生持續下跌,非香港考生嘅人數不跌反升,甚至比去年增加近1.2倍(合共402人)。單計2019年文憑試嘅非本地考生數目,已超逾歷屆總和。

而由2020年度起,聯招辦事處(Jupas)不再接受非本地生透過聯招申請入學。換言之,2019文憑試將會係非本地考生嘅「最後機會」,將來非本地生想入讀香港嘅大專院校,需要個別向院校申請,難度相對較高。但對於本地考生嚟講,絕對係一件好事啦,因為少咗非本地生爭大學資助學位嘛!

來源:DSE公開試秘密拆解 英語聆聽背景音樂點解用「綠袖子」?

DSE非本地考生人數創新高 「最後一試」明年起不能經聯招報港大學

【DSE 2019】內地考生湧港?今屆非本地考生逾400名 超歷屆總和