【共享概念】共享自修室搞「免費鬥坐」蝕大本 90後大學生:食物飲品消耗快!
START UP

【共享概念】共享自修室搞「免費鬥坐」蝕大本 90後大學生:食物飲品消耗快!

蘋果動新聞撰文】

香港土地問題嚴重,問題除了困擾打算上車人士之外,不少學生都要面對溫習空間不足的問題。90後Jason(律師)、Ivan(工程師)及Toby(測量師),約6年前分別在倫敦、劍橋等一流大學畢業後回流香港發展。去年見事業有一定基礎,且香港學生與英國同樣面對「空間不足」問題,決定夾份投資逾百萬、在上環開設共享自修室Cozy by werkspace。

Jason坦言,3位老闆正職同樣忙碌,開共享自修室不多不少都是為了「輕鬆賺錢」。但自修室去年9月開業至今,暫時仍未獲得盈利,令他們大感頭痛,更因一次宣傳令公司「蝕大本」!

訪問在上周六下午進行,記者到自修室視察2小時,發現自修室人流不算太多,1,600呎單位最多可供50人同時使用,但其間只有8人使用。以用戶來說十分清靜、舒適,但作為經營者難免有點擔心。客人之一,現正準備醫科專科試的Shizuka表示,街外的咖啡店十分嘈吵、地方又狹窄,「我覺得一定要光猛、舒服,同埋依度好多嘢食!」

而Anna就指男朋友都是醫科學生,自修室最吸引人的地方就是「任飲咖啡」:「佢都好忙,陪男朋友溫書都會過嚟,當係拍拖。」她們都異口同聲表示:「老闆都好親切,見我哋好忙都會幫我哋加嘢飲。」但認為日間時自修室太光猛,要揀選離窗邊較遠的座位。

共享自修室基本收費40元一小時,學生2小時起享有半價優惠,另設5日、月票等,而自修室亦設咖啡機及零食櫃供客人免費使用。Jason表示,「我哋計過,日票都係60蚊,去coffee shop買一至兩杯嘢飲都差唔多」。

Cozy by werkspace在上環街市附近,創業初期,眼見客量未有起色,3位老闆決定在去年12月考試季節舉辦「鬥坐比賽」。Jason表示:「我哋就諗不如做類似大胃王嘅挑戰,可以畀多啲人認識我哋,所以搞咗個學生挑戰優惠。」

Ivan指,活動只要學生連續在自修室坐10小時就可以免費,其間不能出外用膳,只可以叫外賣:「活動進行咗3星期,估唔到個個都挑戰成功。」亦有部份客人因不能出外,不斷進食自修室提供的免費食物。Ivan指:「最大問題都唔係入場費,而係燈油火蠟,佢哋多數都會食好多嘢,食物嘢飲消耗得好快!」他續指:「又無話後悔嘅,因為真係有學生帶朋友,但之後應該唔會再搞啦。」Jason直言:「一開始諗依個挑戰應該好難去完成,但我哋低估咗學生忍耐能力…都唔係全部蝕晒嘅,但我哋無再做啦。」

3位老闆表示每月營業開支約10萬,月蝕數萬,現積極開源,坦言選址人流比想像中少,而客源比想像中有分別。Ivan解釋,「當初諗住近學校會多學生嚟,但估唔到大學生寧願返學校,反而住喺度但唔係讀港大嘅大學生比較多。」為努力扭虧為盈,打算專攻女性市場:「好似同其他公司合作搞工作坊,真係好吸引女客人去做,例如係卡、或者好靚嘅蠟燭,都會經常收到查詢問將來會唔會再開。」

訪問途中,自修室亦正舉辦蠟燭工作坊,5人小班連導師清一色為女性,導師Janet就指,以往多在上環一帶開班,而在自修室開班後報堂人數明顯增加,打算有長期合作。問到會否擔心現時公司仍要虧損,Ivan坦言「都無得心急啦,要接受,慢慢嚟。」他指創業比想像中難,但深信共享空間在香港仍有需求:「好似大型補習班、office包場,因為見到好多企業都有興趣。」

(左起) 90後Jason、Ivan及Toby名校出身,皆為專業人士,但第一次創業難免要交學費。

 

Shizuka(左)及Anna皆指,任飲任食及地點都是自修室吸引她們的地方。

 

蠟燭班導師Janet(右)指,會定期在自修室舉辦課程。

 

記者:梁延宇