職場求生術!你必須戒掉的3種辦公室超討厭行為!
職場新手

職場求生術!你必須戒掉的3種辦公室超討厭行為!

啲人話職場如戰場,投身社會工作同讀書時候嘅好唔同。自由度可能係大咗,但要睇路嘅地方都多咗,職場求生術有好多嘢要留意,但係第一步你要知一定係3種辦公室超討厭行為!各位職場新寶寶記住留意啦!

1. 「唔識」「唔知」「唔熟」

職場新仔最棹忌咩都Say No!職場新人就好似一舊海綿咁要不斷吸收不斷學習,就算真係唔識都自己試吓搵答案。辦公室唔會再好似學校咁,唔會再有人捉住你手仔逐樣教,好多時都要自己摸索自己學。尤其是可以喺網上搵到答案嘅問題,或者有reference可以跟嘅工作就唔好係咁問人點做。

職場上,每個人都有自己嘅嘢要忙要兼顧,肯幫你係情分,唔肯幫你係本分。如果樣樣嘢都因為「唔識」、「唔知」、「唔熟」而要人幫嘅話,咁請你返嚟做咩,叫你同事做埋啲嘢咪得!

▲ Cosmopolitan.com.hk

2. 「唔知點講」

「唔知點講」、「唔知點出聲」從來都唔係被動或者卸波嘅藉口。喺職場做嘢就係要主動啲,好多時並唔係人哋忽略你,而係你唔夠主動。例如食lunch咁,可以主動問同事「可唔可以一齊食」。有時候,你唔主動出聲唔主動提,根本無人會知,你嘅同事唔會係你肚入面嗰條蟲。

▲ Cosmopolitan.com.hk

3. 「佢針對我」

投身社會做事要堅強啲,唔好帶埋玻璃心出嚟工作。別人嘅意見同批評好多時都係針對事而非針對人,做人處事嘗試變得成熟,唔好郁啲就覺得被人針對。當就算真係俾人針對又點?要不你就直接同佢講,再唔係就辭職?如果唔係就委屈吞咗啖氣,然後把事情努力做好,令到針對你或者小看你嘅人都無聲出!