女校生才懂的六件事!比男仔更粗魯、暗戀男老師,你中咗幾多樣?
校園生活

女校生才懂的六件事!比男仔更粗魯、暗戀男老師,你中咗幾多樣?

【Cosmopolitan.com.hk撰文】

久唔久就會聽到人話「都估到你係女校生」或者「都估到你讀女校」!唔通女校生真係有跡可尋,定係讀女校有樣睇?究竟現實中讀女校又係一個點嘅故事,今次同你分享女校生才懂的六件事,唔知你又會唔會有共鳴呢?

女校生才懂的事一:零儀態可言

你以為女校生斯文有禮含羞答答,你錯啦!女校生隨時粗魯過男仔,翹腳坐呢啲小兒科,女校生好多時鍾意盤腿甚至擘大腳坐,唔驚走光咩?傻啦,大家都著哂打底褲,怕什麼!熱嘅時候仲會直接揭起條裙撥涼!

女校生才懂的事二:個個都係女漢子

▲ Cosmopolitan.com.hk

因為無男生嘅關係,幾乎所有事情都要女仔一腳踢!小至擔擔抬抬搬枱搬櫈,大至搭台砌booth都無問題。所以邊個話要靠男仔,當冇男仔嘅時候女仔做埋男仔嗰份又點話!

女校生才懂的事三:沒有「尷尬」兩個字

▲ Cosmopolitan.com.hk

當全部都係女仔嘅時候就係咩都講得,完全無底線!喺課室大嗌「邊個有M巾?」或者大聲討論性嘅話題都完全零尷尬,乜都講唔需要隱瞞。如果你覺得女仔唔會講粗口你就大錯特錯啦,女仔講起粗口上嚟有時仲麻甩過啲男仔!

女校生才懂的事四:TB風頭躉

▲ Cosmopolitan.com.hk

每間女校總有幾個超帥氣TB,唔講絕對會以為係男仔!而呢啲帥氣TB都會係學校嘅風頭躉,會有一班低年級妹妹粉絲甘願成為佢哋嘅裙下之臣,每個小息每日放學都會去課室門口等佢哋!作為風頭躉又點可以唔玩運動呢?所以佢哋通常都會係運動健將,雖然生係女兒身,但骨子裡隨時man過啲男仔!唔知你有有冇曾經暗戀過佢哋呢?

女校生才懂的事五:暗戀男老師

▲ Cosmopolitan.com.hk

可能因為女校冇乜男人嘅關係,所以稍為後生少少嘅男老師都會超級受歡迎,更會有唔少女同學暗戀佢哋。你千祈唔好以為佢係高大靚仔才華洋溢,其實佢只係一個普普通通(戴眼鏡)嘅男老師!

女校生才懂的事六:火星文解讀

▲ Cosmopolitan.com.hk

女校生都有一個超能力,就係解讀火星文!但究竟乜係火星文呢?其實就係Chinglish,可以話係廣東話拼音夾雜英文,好似「nei gum yud sik jor rice mei?ngo sik jor sushi ar!」就係「你今日食咗飯未?我食咗壽司呀!」睇唔明?因為你唔係女校生囉~

推薦閱讀:

➤ 智力行先不輸男選手!女子職業電競選手PandaCute,不怕廢青標籤繼續追夢

➤ 【除夕倒數】多國風餐廳聖誕大餐10大推介

➤ 為港爭光再創紀錄!一起游過百多場賽事,歐鎧淳、鄭莉梅及陳健樂:不怕隊友離場