中學拍拖一定有做過嘅事
校園生活生活態度

中學拍拖一定有做過嘅事

近年凡係同中學校園戀愛有關嘅電影同劇集,總係會喺網上爆紅。但係到底咁狗血嘅劇情點解仍然會引起到大家嘅關注?歸根究底,相信都係因為當中嘅青春同熱血引起到大眾嘅共鳴!後生嘅用嚟幻想;成熟嘅用嚟回憶。而家就等小編同大家分享一下中學拍拖常見嘅十五件事,睇下你會唔會都有相似嘅經歷!

約埋一齊返學放學

讀中學嗰陣,約埋男女朋友一齊返學放學是常識吧。同大學唔同,中學嘅同學仔大部分都係住喺同一區,甚至係相鄰嘅屋苑,所以約埋一齊行返學個段路仔真係極常見嘅事。而放學嘅話,就緊係會等埋對方先一齊走啦。

小息午飯糖痴豆

既然返學放學都要一齊,小息同lunch time點可以唔做孖公仔呢?緊係要一齊落小食部或者留喺課室撐枱腳同傾計啦。

傾電話傾天光

到夜晚咁上下嘅時間,小情侶多數都會開始煲電話粥,一傾就成日傾上三五七個鐘,傾通宵完全係好閒嘅事。而當中更加常見嘅情況,緊係傾傾下傾到瞓著啦!第二朝一瞓醒發現電話仲喺枕頭邊,甚至仲未收線,其實都幾warm。

一齊温書但總係失敗

想兩個人去拍下拖,但係又一大堆功課測驗考試咁點算?「我地一齊去自修室/咖啡店温書啦!」呢句說話真係冇得輸。但係隔離坐住男女朋友,你確定忍到唔傾下計同拖下手仔?到最後返屋企,本書分分鐘都唔知有冇揭過去下一頁。

上堂偷偷互望

如果咁好彩係同自己男女朋友同一班,上堂嗰陣偷偷互望都可以話係指定動作之一。雖然未必係坐隔離位,但係就算隔得好遠,耐唔耐同對方交換一個眼神,一個笑容,你都咪話唔甜到入心!

偷入對方班房

中學就多數都唔俾入其他人班房嘅,但係小息午飯同放學嗰陣點會唔偷偷地跑入去搵對方吹下水呀?朋友都會,更莫講話係熱戀中嘅小情侶啦。

偷偷喺櫃桶互發信息

雖然犯校規,但係小編就唔信你地冇做過喇!同對方呻下上緊嘅堂有幾悶,傾下一陣放飯食咩,咁重要嘅野冒住俾老師捉嘅風險都要講咗先㗎啦!

銀包放合照

冇得光明正大喺學校拖手,又想同全部人分享自己拍緊拖嘅甜蜜,最常見嘅做法實係放同對方嘅合照喺銀包啦!一打開就自己同朋友都見到喇。

用情侶款文具

拍拖嘅熱戀期,你話係宣示主權定放閃都好,兩個人總會想同對方有啲一樣或者同款嘅嘢。既然冇得著情侶裝,買下情侶款嘅文具或者書包就基本嘢啦。

小小事就嘈一餐

唔知係咪因為日見夜見,中學時期拍拖好似成日會因為小小事就嘈一餐。好易妒忌,好易呷醋,好易有拗撬,但係每次又總會好快和好。

一鬧交全班都知

本身兩個人鬧下交都冇乜嘢嘅,但係如果係同同校甚至同班嘅人拍拖,真係一鬧交就全班都知。孖公仔變陌路人,甜笑變黑面喎,你當同學仔盲嘅咩!

互送DIY禮物

對未有經濟能力嘅中學生嚟講,可以買嘅禮物選擇唔多。所以到咗大時大節同紀念日嗰陣,DIY絕對係不二之選。當中最常見嘅禮物,應該都非相冊莫屬。有相有字有心思,絕對係最common得嚟又最有誠意嘅禮物!

俾同學瘋狂抽水

喺學校拍拖,俾同學瘋狂抽水就一定無可避免㗎喇!見住你地係咁交換眼神,又係咁放閃,叫其他單身嘅同學仔情何以堪呀?唯有抽下你地水,笑下你地咁啦。

無視屋企人反對

中學生應否談戀愛?真係由古代討論到去2046都唔會有結果。學生有學生支持,家長有家長反對。但係既然開始得拍拖,屋企人點反對,對小情侶都一於懶理啦。

一齊憧憬將來

雖然中學生拍拖成日會俾人話係puppy love玩玩下,但反而因為年紀仲細,冇成年人咁多現實嘅考量,兩個人傾計嗰陣往往會成日一齊憧憬將來,諗下未來嘅家會係點,真係sweet到一個點。

相信上面呢十五件事,大家就算冇親身經歷過(唔好傷心!),都總會係中學時期親眼目睹過。呢啲所謂嘅青春,真係一去不復返㗎!所以如果仲係中學生嘅大家,記得要好好珍惜,創造更多獨特回憶!如果係同小編一樣,往事只能回味嘅話,回憶完就好繼續俾心機做嘢喇!

 

圖片來源: 我的少女時代