來自香港寬頻COO的啟示
職場新手

來自香港寬頻COO的啟示

香港寬頻COO寫俾2,700位申請香港寬頻「Summer innovator and Marketing & Finance Trainee」求職者的一封信,內容串得來,又有些啟示。 

封信大意係講,香港寬頻教你嘢,讀書無乜用,最緊要令我哋有驚喜,即係sell下橋咁,唔好讀死書,仲有面試前 “please do your homework”,你要到時講到啲嘢,點樣改進我哋公司,「唔好為面試而面試,而要為WOW我哋而來。」

我們請教過人力資源顧問朋友,面對咁「大支嘢」,佢覺得:

1.唔好停留於追求100分:

學校時期每位學生都追求100分,但出到來社會,要跳出既定框框,唔好再停留於追求100分,反而應該諗闊啲,諗吓點樣在200分入面拎到150分,仲實際。 

2.Cover letter重要過一切:

好多求職者都唔睇重cover letter,上網抄咗個sample,就咁改返個title同公司名,就一份cover letter走到老。但香港寬頻的COO同你講:「Cover Letter重要過你份CV同埋你公開試拎咩Grade!」一份差的cover letter只講自己有咩好及點解對份工有興趣,反而一份好的cover letter就講到個人強項點樣應用到在新工上,以及點樣貢獻新公司。 

3.面試前做足功課,分析競爭對手的年報:

睇年報網頁呢類準備工夫當然不在話下,更重要係留意行業,分析埋競爭對手的年報及網頁,話俾新公司聽有咩可進步。咁先彰顯到自身價值。 

總括來講,唔好停留在話俾大家聽「阿媽係女人」呢類咁膚淺層次,而係要話俾大家聽「阿媽靚喺邊」,咁你就得道升仙喇!